Naifmvlog

Naifm vlog Gossip and News

බෙලි වල සැගවුණු ගුණ

මිහිරිතම රසයකින් අනූන නොවුවද බෙලි පෝෂණීය මෙන්ම ඔෟෂධීය ගුණයෙන්ද පිරි කදිම පලතුරකි. තද රසයක් නැති අමුතු රසක් ඇති බෙලි ක්‍රීම්වලට ඇතැමුන් හරිම කැමැතියි. ආයුර්වේදී වෛද්‍ය කලාවට අනුවද බෙලි ඉතාම ගුණදායක ආහාරයක් වගේම කසාය සහ අත් බෙහෙත් සඳහාද මිල කළ නොහැකි ගුණයෙන් යුතු දායකත්වයකි. මේ බෙලි ගැන කියැවෙන තවත් වටිනා තොරතුරු රැසකි.

ග්‍රාම්‍ය සහ වන්‍ය වශයෙන් බෙලි වර්ග දෙකකි. ග්‍රාම්‍ය යනු කටු අල්ප වශයෙන් තිබෙන විශාල බෙලිය. වන්‍ය යනු කටු අධිකව තිබෙන කුඩා බෙලිය. ඉන්දියාවේ සෑම නගරයකම සහ ගමකම වැවෙන මෙය ලංකාවේ සහ බුරුමයේද වැවේ. ආයුර්වේද වෛද්‍ය විද්‍යාවේදී බෙලි ගසෙහි මුල්, මල්, කොළ, පොතු, ගෙඩි වශයෙන් පංචාංගයම ව්‍යවහාරයට ගනියි. කල් තබා ගැනීමේදී බෙලි ගැට වයසේදී කඩා මඳ පවනේ වියළා වියළි පසුබිමක් සහිත භාජනවල අසුරා තබයි.

බෙලි කොළවල ස්වරසය දියවැඩියාව පාලනය කරයි. කොළ භාවිතයෙන් කසාය සාදා පානය සඳහා ගැනීමෙන් දාහය, පිපාසය, වමනය සමනය කරයි.

බෙලි මුල කසාය කර පානයට ගැනීමෙන් උණ, අතීසාරය, අජීර්ණ, ග්‍රහණි රෝග බඩගිනි නැතිකම සුවපත් කරවයි.

බෙලි මදය ආහාරයට ගැනීමෙන් හෝ යුෂ ලෙස පානයට ගැනීමෙන් අතීසාරය, ග්‍රහණි, අර්ශස්, මල බද්ධය, අම්ල පිත්ත රෝගයනට සුවවේ.

ඉදුණු බෙලි මදය සූරා පොල් කිරි මිශ්‍රකර සීනි සහ ලුණු ඇවැසි පමණට දමා පිළියෙල කරගත් පානය ආහාර ගැනීමෙන් අනතුරුව පානයට ගැනීමෙන් ආහාර පහසුවෙන් දිරවයි. ධාතු වර්ධනය කරවයි. විටමින් ඩී. පදාර්ථය අධිකව තිබෙන බෙලිවල පැසුණු ගෙඩි මදය සූරා තම්බා මී පැණි මිශ්‍රකර ආහාරයට ගැනීමෙන් අතීසාරය සහ ලේ අර්ශස් වැනි රෝග සුවපත් වේ. යසස, සෞභාග්‍යය, ශෝභාව, ප්‍රභාව, කීර්තිය, දියුණුව අර්ථවත් කරන බෙලි ආහාරයක්, පලතුරක් මෙන්ම ඖෂධයක් ලෙසද වැදගත් වේ.

ආම වාතයට, ආහාර රුචියට සහ සිරුර සිසිලට ඉදුණු බෙලි මද කළං 12, සීනි කළං 4, ලුණු ඇවැසි රසට ගෙන වතුර පතකට දියකර පෙරා උදේට හිස් බඩ පානයට ගන්න.

තුනටියේ වේදනාවට සහ ලේ අතීසාරයට බෙලි ගැට මද කොටස් තුනයි, උක් හකුරු කොටස් දෙකයි ගෙන හොඳින් මිශ්‍රකර වරකට කළං එකහමාර බැගින් කෑමට ගන්න.

ග්‍රහණි රෝග සහ ආමාශ රෝග වියළා කුඩුකර ගත් බෙලි ගැට මද ඉඟුරු කුඩු එකට ගෙන මිශ්‍රකර මෝරු සමඟ පානයට ගැනීම සුවදායකය.
රක්ත අතීසාරය සඳහා වියළා ගත් බෙලි ගැට මද, වැල්මී චූර්ණය මී පැණි සමඟ හෝ හාල් පානු දියෙන් ගැනීම ගුණදායකය.

අමු බෙලි බඩගිනි වඩවයි, ආහාර පැසවීම ඇති කරවයි. මල කැටි කරයි. ඇඹුල් රසැති උෂ්ණකාරක අමු බෙලි සිරුරට සැහැල්ලුය. ආම වාතය නසයි. හෘද රෝග සමනය කරවයි.

බෙලි මල් වඩාත් ගුණදායකය. සිරුර සිසිල් කරවයි. තේ, කෝපි වෙනුවට පානය කිරීමෙන් ආහාර රුචිය වඩවයි, පිපාසය නසයි. පිත නැතිකර වමනය සමනය කරයි. කුරුලෑවලට ගුණදෙන අතර වාත රක්තය, පොතු කබර, සුදු කබර, සමේ රෝගවලට ගුණදායකය. සම පැහැපත්කර ලප කැළැල් නැති කරයි.

බෙලි මුල් කසාය තම්බන විට විශේෂයෙන් යොදා ගැනේ. දස මුල් කසාය මෙහිදී වැදගත්ය. වාත රෝග ඉන් සමනය වේ. බෙලි මුල් සහ පොතු මුසුව තනන කසාය බීමෙන් ඇදුම රෝගය සුවපත් වේ.

බෙලි කටු බෙලි කටු තම්බා පානයට ගැනීම පැරැණි අය අතර පුරුද්දකි. සිරුරට සිසිලස ලැබේ.

බෙලි කොළ විෂ්ණු පූජාවට බෙලි කොළ නැතිවම බැරිය. පූජාවෙහි යම් අඩුවක් වේ නම් බෙලි කොළ නිසා එය සම්පූර්ණ වන බව කියැවේ. බෙලි කොළ යුෂ තිප්පිලි සමඟ බීමෙන් මල බද්ධය නැතිවේ. මුත්‍රාවල තිබෙන සීනි සමනය කරයි.

බෙලි ගසෙහි භූත දෝෂ නසන බලයක් ඇතැයිද මතයක් ඇත. බෙලි කටු, බෙලි මුල් ගෙන වියළා කුඩුකර දුම් ඇල්ලීම ඇතැමුන්ගේ සිරිතය. බෙලි ගස මත සිරිකත වසන බව කියැවේ. බෙලි ගස නසන මිනිසා දෙවියන්ගේ උදහසට ලක් වන අතර, එය රකින්නට වෙහෙසෙන්නා දෙවියන්ද රකියි. බෙලි ගස් පහක් සිටුවීම දෙව්ලොව සැප පිණිස යැයි කියැවේ. එකී සියල්ල සාක්‍ෂි සහිතවම භාරතීය ග්‍රන්ථවල සඳහන් වේ.
ළදරුවන් සඳහා අත් බෙහෙතකි. බෙලි මුල් පොතු කළං 12ක් වතුර පත 4 – 1ට සිඳුවා කසාය කර පොරි කුඩු සහ සූකිරි මිශ්‍රකර බීමට දීමෙන් වමනය සහ අතීසාරය සමනය වේ.

වැඩිහිටියන්ගේ සෙම් සහිත රෝගයන් සඳහා බෙලි මුල්, පොතු, සහල්, අමු ඉඟුරු, එළු බෙටි සමඟ සමව ගෙන අඹරා මඳක් රත්කර ආලේප කිරීමෙන් සහනය ගෙනදේ.මෝරු සාදා ගන්නා අන්දම මුදවපු කිරි කොටස් 4 වතුර කොටස් 4, ලුණු, අමු මිරිස්, රතු ලූනු හොඳින් මිශ්‍රකර බ්ලෙන්ඩර් කරගන්න.

උපදෙස් – වෛද්‍ය නිරංජලා වික්‍රමසිංහ නිරංජලා වෛද්‍ය ආයතනය 0775886265
දමයන්ති රේණුකා ප්‍රනාන්දු
උපුටා ගැනීම මව්බිම